Ekstradohen katër shtetas të dënuar për narkotikë nga Greqia dhe Italia në Shqipëri
Policia e Shtetit ka bërë të ditur finalizimin e një operacioni të suksesshëm ndërkombëtar, në bashkëpunim me strukturat homologe të INTERPOL-it në Tiranë, Romë dhe Athinë, që çoi në ekstradimin e katër shtetasve të dënuar apo të akuzuar për veprimtari kriminale në fushën e narkotikëve.
Sipas njoftimit zyrtar, janë përfunduar procedurat për ekstradimin në Shqipëri dhe Itali të këtyre shtetasve:
1. Altin Merdani, 46 vjeç, u ekstradua nga Greqia në Shqipëri. Ai është dënuar nga Gjykata e Gjirokastrës në vitin 2017 me 4 vjet e 8 muaj burg për veprën penale “Prodhimi dhe shitja e narkotikëve”. Në vitin 2015, në bashkëpunim me dy shtetas të tjerë, ai transportoi rreth 100 kg Cannabis në fshatin Frashër të Përmetit. Gjatë këtij aktiviteti kriminal, ndaj tyre u qëllua me armë, dhe si pasojë mbeti i plagosur një nga bashkëpunëtorët. Aktualisht, Merdanit i kanë mbetur për të vuajtur rreth 2 vjet e gjysmë burg.
2. Fatmir Isollari, 58 vjeç, u ekstradua nga Shqipëria në Itali. Ai është dënuar nga Gjykata e Apelit të Firences me 7 vjet burg për trafikim të kokainës në kuadër të një organizate kriminale.
3. Xh. H., 30 vjeç, u ekstradua nga Shqipëria në Itali, pas vendimit të Gjykatës së Romës për masën e sigurisë “Arrest në burg”. Ai akuzohet për trafikim të lëndëve narkotike, pjesëmarrje në komplot kriminal dhe zhvatje në rrethana rënduese.
4. A. A., 27 vjeç, u ekstradua nga Shqipëria në Itali, pasi Gjykata e Romës kishte lëshuar një urdhër arresti për veprën penale “Trafikimi i lëndëve narkotike”.
Policia e Shtetit thekson se bashkëpunimi me autoritetet ndërkombëtare mbetet prioritet në luftën kundër krimit të organizuar dhe sjelljen para drejtësisë të shtetasve të përfshirë në veprimtari kriminale, brenda apo jashtë vendit.
